მესი ნეიმარის საქციელით გაბრაზებულია

მოგეხსენებათ, გასულ უქმეებზე ლა კორონიის "დეპორტივომ" კატალონიის "ბარსელონას" უმასპინძლა და ანგარიშით 2:1 იმარჯვა. ამ მარცხის გამო "ბლაუგრანამ" ლიდერობა მადრიდის "რეალს" დაუთმო და შეიძლება ითქვას, რომ ლა ლიგის ცხრილში საკმაოდ გაირთულა საქმეები. აღნიშნულ მატჩში მონაწილეობა არ მიუღია კატალონიელთა ერთ-ერთ ლიდერ ნეიმარ ჯუნიორს. ამის მიზეზად კი ტრავმა დასახელდა. თუმცა, ესპანური გამოცემა Diario Gol სენსაციურ ინფორმაციას ავრცელებს. როგორც ცნობილია, თამაშის დღეს დაბადების დღე ჰქონდა ბრაზილიელი შემტევის დას, რაფაელას. წყაროს ცნობით, სწორედ ამ მიზეზის გამო გამოტოვა 25 წლის შემტევმა "დეპორტივოსთან" მატჩი, რამაც საბოლოოდ საკმაოდ ცუდი შედეგები გამოიწვია. ესპანური გამოცემის ინფორმაციით, ამ ამბავმა ძალიან გააბრაზა კატალონიური გრანდის ლიდერი, ლიონელ მესი. ჯერ-ჯერობით უცნობია, დასჯიან თუ არა ნეიმარს კლუბში. თუმცა, გაზეთის ცნობით 29 წლის შემტევი მომხდარ ფაქტთან დაკავშირებით თანაგუნდელთან სერიოზული დიალოგის გამართვას გეგმავს.